Velkomne, kystgeiter!

Velkomne, kystgeiter!

I haustferien var vi til Nordmøre og henta heim ein liten flokk med geiter, som no skal leve og høyre til her hos oss. Ein kan sikkert seie mykje om geiter, men det fyrste er at det er fine og veldig trivelege dyr, som gjerne har ein sterk personlegdom.

 

Geitene våre er av rasen Norsk Kystgeit og stammar frå kystgeitflokkane på Stadtlandet. 

Tidlegare var det vanleg å halde geit i vårt distrikt, og så også på Nerlandsøya. Jakob P. Kopperstad (f. 1931) fortalde at dei hadde geiter "Opp i gara" på Koparstad i hans barndom. Dette var geiter som ikkje vart mjølka, men som gjekk i utmarka mesteparten av året og som til visse tider vart samla for merking og uttak av slaktedyr. I fylgje Jakob vart dei siste kystgeitene på Nerlandsøya skotne under 2. verdskrigen. 

Seinare har restar av den gamle kystgeitstammen på Sunnmøre berre overlevd i forvilla tilstand på Sandsøya og Skorpa. Men no er dei altså tilbake på Nerlandsøya! Noko som er mulig takka vere eit nystarta avlssamarbeid i Sunnmøre og Romsdal Kystgeitlag. 

  

Hos oss starta geiten umiddelbart på jobben, og sørga raskt for å fjerne det grøne på den einaste einen i innmarksbeitet rundt løda vår. 

 

Gjengen er nok snart klare for større oppgåver som ryddemannskap i kystlyngheia!

 

 

 

Vi hadde høyrt at geiter er gode til å klatre og at dei kan vere både nysjerrige og rampete. Det viste seg å stemme, det tok ikkje mange dagane før vi fann dei att på lødetaket...